Dingdong Dantes on "Stairway To Heaven" Remake

May nakuhang impormasyon ang PEP (Phillipine Entertainment Portal) na may nakahanda na palang next project para sa isa sa top leading man ng Kapuso network na si Dingdong Dantes pagkatapos ng Ang Babaeng Hinugot Sa Aking Tadyang—na magwawakas na bukas (May 1)—nila ni Marian Rivera.

Kung si Marian ay sigurado na ang pagganap bilang Darna sa pagbabalik sa telebisyon ng Pinay superhero, si Dingdong naman ay lalabas naman daw sa isang Pinoy adaptation ng isang sikat na Koreanovela.

Ayon sa isang source mula sa GMA-7 mismo, ang next TV project ni Dingdong ay ang Stairway To Heaven, na unang ipinalabas sa Korea noong 2003 to 2004 at napanood naman sa Pilipinas, dubbed in Filipino, noong 2005 sa Kapuso network din.

Si Dingdong diumano ang gaganap bilang Cholo, na unang ginampanan ng Korean superstar na si Kwon Sang Woo sa original version.

Kung totoo ngang si Dingdong ang gaganap sa naturang role, ito ang ikalawang pagkakataon na gaganap siya ng isang character mula sa sikat na international TV series. Nauna na rito ang pagganap niya bilang Sergio Santibañez sa phenomenal hit na Marimar, na unang ginampanan ni Eduardo Capetillo sa original Mexican version nito.

Ayon pa sa aming source, wala pang napipili ang Kapuso network kung sino naman ang gaganap sa female lead character na si Jodi, na unang ginampanan ng sikat ding Korean actress na si Choi Ji Woo. Pero may mga pangalan na raw na pinagpipilian, although hindi na kasama si Marian dahil gagawin na nga nito ang Darna.

Upang kumpirmahin ang balitang si Dingdong ang gaganap na Cholo sa Pinoy version ng Stairway To Heaven, kinuhanan namin ng pahayag ang manager ng actor na si Perry Lansigan. Pero wala itong kumpirmasyon na naibigay.

Aniya, "Wala akong alam. Hindi ko alam kung siya nga ang gagawa ng Stairway to Heaven. Naririnig ko na 'yan noon pa, pero, usually, sabi-sabi. Pero so far, wala pa namang formal offer kaming natatanggap."